Mae CC Cymru wedi agor llwybr beicio newydd yng Nghoedwig Brechfa ger Caerfyrddin. Mae llwybr newydd, a elwir yn llwybr y Dderwen, yn galluogi teuluoedd a dechreuwyr i fwynhau prydferthwch coetir naturiol hynafol wrth iddo ymdroelli drwy 10km o goedwig Brechfa.
Y llwybr hwn, sydd wedi ei raddio’n wyrdd ac sydd yn addas i ddechreuwyr, yw’r ail lwybr i’w gael ei adeiladu yn y coetir hwn a reolir gan Gomisiwn Coedwigaeth Cymru yn dilyn agoriad llwybr Gorlech, llwybr coch anoddach a lansiwyd ym mis Awst 2006.
Mae’r llwybrau - y trydydd, llwybr du eithafol a elwir Y Gigfran sydd i’w gwblhau ym mis Hydref - yn rhan o Brosiect Beiciau Brechfa sy’n gweddnewid potensial y coetir i ddenu ymwelwyr drwy greu rhwydwaith o lwybrau beicio wedi’u marcio yn y coetir amrywiol 7,000 ha tra’n cynnig gwell cyfleusterau ar gyfer defnyddwyr eraill yr un pryd..
Mae Comisiwn Coedwigaeth Cymru wedi datblygu nifer o lwybrau beicio mynydd gyda’r gorau yn y byd drwy Gymru i gwrdd â galw cynyddol am y gamp boblogaidd hon – a bellach mae’r ardal o gwmpas Coedwig Brechfa yn elwa hefyd.
Bydd y llwybr teuluol a llwybr y Gigfran yn cychwyn o faes parcio Byrgwm (ddwy filltir i’r dwyrain o bentref Brechfa), a bydd dwy adain cigfran dri metr o uchder yn dynodi’r man cychwyn. Gwnaed yr ‘adenydd’ gan gerflunydd lleol o’r enw David Lloyd, ac fe’i lluniwyd o dderw a Ffynidwydd Douglas o Goedwig Brechfa ac fe’u llosgwyd nes eu bod yn ddu er mwyn er mwyn efelychu lliw plu’r aderyn.
Mae’r man cychwyn dramatig y bydd y beicwyr yn mynd trwyddo ar eu ffordd i’r goedwig yn ddolen gyswllt hanesyddol â chigfrain Tŵr Llundain, y credir iddynt gael eu cymryd o Goedwig Brechfa ganrifoedd yn ôl.
Meddai Brian Rumble o Gomisiwn Goedwigaeth Cymru sy’n arolygu Prosiect Beiciau Brechfa, " Bydd llwybr y Gigfran yn llwybr anodd, yn dechnegol a chorfforol, a bydd yn 30km o hyd o leiaf ar ol ei gwblhau."
"Mae’r llwybr teuluol yn dilyn yr un patrwm â’r llwybr coch, sef llwybr Gorlech, ond mae’n llawer haws. Bydd y beicwyr yn gallu teimlo sut mae’r llwybr yn gweithio, a cheir yma gorneli ar oleddf, ‘cildroadau gradd’ sy’n rheoli cyflymder, ac incleiniau a gelltydd ar i waered ac yn y blaen.
"Rydym yn hyderus y bydd y llwybr yn denu teuluoedd a phobl i’r ardal i fwynhau’r coetiroedd gwych hyn."
Mae Prosiect Beiciau Brechfa yn brosiect ar y cyd rhwng Comisiwn Coedwigaeth Cymru a Chyngor Sir Gâr, mewn partneriaeth â’r gymuned. Ariannwyd y prosiect gan arian Amcan 1 o Ewrop a Chynulliad Cymru, a chafwyd cyfraniadau gan y partneriaid. Ceir arwyddion eisoes bod y llwybrau yn hybu cymunedau drwy ddarparu cyrchfan i deuluoedd a beicwyr profiadol fel ei gilydd.
Mae llwybrau beicio mynydd Comisiwn Coedwigaeth Cymru mewn rhannau eraill o’r wlad yn denu miloedd o feicwyr bob blwyddyn wrth i’w henw da fynd ar led, ac maent yn dod â miliynau o bunnau i’r economi lleol.
