Ydych chi’n ystyried plannu coed ar eich tir?
Os ydych, efallai y gallai cynllun Creu Coetiroedd Glastir eich helpu.
Nod y cynllun yw helpu i wireddu’r addewid a wnaed gan Llywodraeth Cymru yn ei strategaeth goetiroedd, Coetiroedd i Gymru, i ddarparu mwy o arwynebedd o goed.
Mae’r cynllun yn darparu:
- cymorth ariannol i greu coetiroedd brodorol a choetiroedd cymysg newydd
- cyngor a chymorth arbenigol yn rhad ac am ddim.
Darllenwch ymlaen i gael gwybod rhagor am gynllun Creu Coetiroedd Glastir.
Pwy all wneud cais am grant Creu Coetiroedd Glastir?
Mae pob tirfeddiannwr yng Nghymru sydd â mwy na 0.25 hectar o dir yn gymwys i wneud cais o dan y cynllun – does dim rhaid ichi fod yn ffermwr i wneud cais, a does dim rhaid ichi fod yng nghynllun Glastir yn barod.
Gweler rheolau Cynllun Creu Coetiroedd Glastir am ragor o fanylion.
Beth yw cyfraddau grant Creu Coetiroedd Glastir?
Mae tair rhan i grant Creu Coetiroedd Glastir:
- Grant sefydlu sy’n cael ei dalu dros dair blynedd
- Grant ffensio sy’n cynnwys lwfans ar gyfer giatiau a chamfeydd/sticlau.
- Taliad colli incwm (sy’n cael ei alw’n Bremiwm Creu Coetiroedd Glastir).
Gweler cyfraddau grant Creu Coetiroedd Glastir am ragor o fanylion.
Pwy sy’n rhoi cynllun grant Creu Coetiroedd Glastir ar waith?
Cynllun Llywodraeth Cymru i reoli tir yn gynaliadwy yw Glastir; mae’n cynnwys pum elfen, ac un o’r rheini yw’r Elfen Coetiroedd.
Mae’r Elfen Coetiroedd yn cynnwys:
- y cynllun Creu Coetiroedd (sy’n cael ei roi ar waith gan Gomisiwn Coedwigaeth Cymru ar ran Llywodraeth Cymru *)
- y cynllun Rheoli Coetiroedd (sy’n cael ei roi ar waith gan dîm Glastir Llywodraeth Cymru)
Mae’r Elfen Coetiroedd yn rhan o Glastir sy’n sefyll ar ei thraed ei hun – os ydych eisoes wedi gwneud cais am elfen Cymru Gyfan Glastir, gallwch ddal i wneud cais am grant Creu Coetiroedd Glastir.
Gweler y Cwestiynau Cyffredin i gael rhagor o fanylion am sut mae’r Elfen Coetiroedd yn ffitio o fewn Glastir neu lawrlwythwch lyfryn Elfen Coetiroedd Glastir oddi ar wefan Llywodraeth Cymru.
* Bydd cynllun Creu Coetiroedd Glastir yn dal i gael ei redeg gan Gomisiwn Coedwigaeth Cymru ac, wedi hynny, gan Gyfoeth Naturiol Cymru (sy’n dod i rym ar 1af Ebrill 2013) ar ran Llywodraeth Cymru tan 1 Ionawr 2014.
Sut ydw i’n gwneud cais am grant Creu Coetiroedd Glastir?
Rhaid i bob cais gael ei wneud gan Swyddog Creu Coetiroedd Glastir ar ran y tirfeddiannwr – mae’r gwasanaeth hwn am ddim i’r ymgeisydd.
Ymgynghorwyr coetir yw Swyddogion Creu Coetiroedd Glastir sydd wedi cael eu cymeradwyo gan Gomisiwn Coedwigaeth Cymru i ddarparu cyngor a chyflwyno ceisiadau.
Bydd y Swyddogion Creu Coetiroedd yn:
- gwneud yn siŵr fod y tir mewn ardal sydd wedi cael ei dynodi’n un addas i blannu arni
- cynnal ymweliad safle
- egluro rheolau’r cynllun
- datblygu cynllun plannu i’r tirfeddiannwr ei gymeradwyo
- cyflwyno cais am grant ar ran y tirfeddiannwr
Efallai hefyd y bydd rhai Swyddogion Creu Coetiroedd yn cynnig gwasanaethau ychwanegol ar gost i ymgeiswyr, er enghraifft, dod o hyd i’r coed a’u cyflenwi.
Gallwch un ai ddewis Swyddog Creu Coetiroedd oddi ar y rhestr gymeradwy neu ofyn i’r Comisiwn Coedwigaeth neilltuo un ichi.
Beth ydw i’n ei wneud nesaf?
Cysylltwch â Chomisiwn Coedwigaeth Cymru i gael pecyn gwybodaeth neu i wneud cais.
- E-bost: bww.ts@forestry.gsi.gov.uk
- Ffôn: 0300 068 0300
- Ysgrifennwch at: Comisiwn Coedwigaeth Cymru, Clawdd Newydd, Rhuthun LL15 2NL
Sylwch: os nad oes gennych Gyfeirnod Cwsmer (CRN) oddi wrth Lywodraeth Cymru bydd angen ichi gael un a chofrestru’ch tir cyn y gellir cymeradwyo’ch cais am grant Creu Coetiroedd Glastir. Gweler y Cwestiynau Cyffredin am ragor o wybodaeth.
Mae llyfryn newydd Coetiroedd fferm newydd yn dangos sut gall plannu coed gyfrannu at fusnes fferm. Lawrlwythwch y PDF neu cysylltwch â ni am gopi (gweler y manylion cyswllt isod).
Beth os nad Glastir yw’r cynllun iawn i mi?
Mae grantiau Glastir ar gael i blannu darnau o dir sy’n 0.25 hectar o leiaf.
Os ydych chi eisiau plannu darn llai na hyn o dir, efallai y gallai Coed Cadw gynnig cymorth ichi drwy eu cynllun pecyn coed bach.
